ميدان الجيزة/ شارع الجامعة / بياعين الجرايد و الكتب و المجلات المستعملة على أسوار كلية الزراعة و حديقة الأورمان / بتاع الورد على سور الاورمان / كوبري الجامعة والاشارة المقفولة دايما قبله / عم يونس فراش المركز و الابتسامة الواسعة اللي بتونسني و تقول انه فاكرني رغم اني بغيب / محمود والنيسكافيه المضبوط جدا ف المج الأسود / الشجرة اللي مفيهاش غير وردة واحدة بمبي مزهقتش من كتر ما بنصورها ، و نتصور معاها / الشمس الطالعة من غير ما تلسع و نسمة الهوا الساقعة على استحياء / الجيبة السودا الادوار اللي بتخن و اخس و بتفضل مقاسي / عم حمادة و هو بيرتب الميكروباص عشان اقعد ف المكان اللي بحبه / فيروز ف رنة موبايلي / الموبيل اللي مبيبطلش رن بالساعات..عشان شغل / الوحشة / صوتي الرايح / الدموع اللي ببلعها / الابتسامة اللي بتطلع على وشي و انا بقول لنفسي ..مش هنموت،هنعيش/ تاكسي مشغل سيرة الحب بطول شارع الدقي الواقف / التخلي / الدفا اللي بشوفه فجأة في عينين كل الناس اللي معرفهاش ف الشارع/ البرد اللي ف ضلوعي / الكرسي اللي جنب الشباك ف آخر الميكروباص ع اليمين / طريق الفيوم ساعة المغربية / الاحلام اللي بتعدي علي .. و مترضاش تكمل / و الجمل اللي بتتشكل أول كلماتها .. و مترضاش تتم / عتاب الصحاب .. لما يفتكروا / التوهه / الآهه اللي مستنية حضن / الكلام الكتير اللي عايزة اقوله .. و مش بقوله / القرارات الكتير اللي باخدها .. و مش بعمل منها حاجة / الشغل اللي بيبقى فجأة اكتر م الوقت /الحاجة اللي بدور عليها .. و مش عارفاها..
..
المشاهد دي عارفاها .. عارفاها كويس
هي بتتعاد ؟؟
و لا هو الحنين ؟
هناك 11 تعليقًا:
الحنين :))
ألدّ عدو ليا... الحنين.. بيخلي كل حاجة صعبة.. اقولك، حني للحلو بس، و سيبك من الوحشة و الفقد و غيره و غيره.. كلها حاجات هتتكرر شئنا ام ابينا، بس ارفضي حنينك ليها بمجرد انتهاءها
ملحوظة... انا حنجرة بس، بق عالفاضي... باقول نصايح.. و موش بانفذ
D:
هي موجودة و بتتعاد.. لانها جواكي لما دخلت روحك و مطلعتش غير بعد الوشم ما تم و خد لونه و مساحته المحتومة.
دى حاجات يمكن نكون بنزهق منها من كتر ما اتعودنا عليها .. لكن لما بنبعد عنها .. بنحس انها جزء من زكرياتنا و جزء من حياتنا و صورتنا عن نفسنا ..لدرجة انها ساعات بتكون جزء مننا و احنا مش عارفين ..
تفاصيلك رقيقة و دافية و صادقة جدا و مش مفتعلة ..
حمد لله ع السلاااامة
.
.
.
بـــس
يعني
الله .. انا كمان حنيت على فكرة .. اووووي ..
وانتي بجملة الحنين .. جيتي عالمدونة .. ونورتيها كمان :)
كائن الحنين ده لازم يشوفله مكان تانى بقى يعدى عليه..أصلا بيوجع ..مش حاجة حلوة أوى دايما..امشى ياحون حون ...يلا بعيد
طبعا بتتعاد
الدنيا دايرة مقفولة ما بتنتهيش
:)
حمدالله على السلامة نورتي تاني
الحنين من اكتر الاحاسيس الصعبة بتمر دبما علينا
وبالاخص لما نحن لناس كانوا غاليين عليانا :(
مدونتك جميييييييلة اوى
خسارة انى مكتشفتهاش قبل كده
.....
هو الحنين على فكرة
وهو ظاهر اوى خلال التكست
تحياتى
ذكرياتي ... يا ذكرياتي ..يانا منك يا ذكرياتي ... إنتي كل حياتي وأكتر من حياتي
جميل كعادتك أيتها الزهرة البيضاء.
ديدي
إرسال تعليق