الخميس، 2 أبريل 2009

عزيزة بنت السلطان

جى م البلاد البعيدة
لا زاد ولا ميه وغربتى صحبتى بتحوم حواليا
وانتى تقوليلى بحبك
تحبى ايه فيا
وده حب ايه ده اللى من غير اى حرية
يونس فى بلاد الشوق اه ياولد الهلالى
بتونس بدموع العين وانا سايب اهالى
اه ياولد الهلالى لعليا ولابيا
ياعزيزة يابنت السلطان لو يتغير الزمان
وقابلتينى فى اى مكان كنت اعشق من غير ماتقولى
يووونس
انا يونس
كنت هقول اهو ده المحبوب
ويدوب قلبى قبل ما ادوب
اه ياولد الهلالى لعليا ولابي
انا يونس ونسيت مين يونس والدنيا مالت عليا
قلبى ضايع مين يلاقيه لى
باينى نسيته حدا اهلى
ينفع احبك من غير قلبى
ماتردوا عليها وعليا

*************

أسرني أول الأمر يونس .. تعاطفت معه ، أحببته حد التوحد ، رأيتني منه ، و رأيت فيه مني ، غربته و التيه ربما، أشفقت على قلبه الضائع ، حريته المنزوعة ، البعد عن الأهل و الشعور بقهر أيام لم يختر أن يولد بها ، و لم يكن له يد في اختياراتها ، وفرة العجز و انعدام الإرادة أمام غربة تقحم نفسها على صدره.

صدقت تماما أن يونس هو معظمنا .. أو كلنا ، نقص الزاد و الماء ، الغربة ، تلك الحرية التي نبحث عنها فلا نجدها ، بين أيدينا ربما و لا نراها،تمثلها في مجرد قرار .. أبدا لا نتخذه ، أو مسروقة منا في زخم الحياة هذا .. الذي يسكنه و يسكننا منه .. فرااااااغ

الأسر ..

انحصارنا بين قرارتنا الاختيارية بالــ ( لا )، و رغباتنا القاتلة في البقاء على بر نعرف على أرضه طعما للراحة،

رغباتنا التي لا نعرف أبدا .. هل هي حقا ؟؟



أحببت يونس حد التوحد .. حتى تذكرت عزيزة

بنت السطان

تلك التي قالت بحبك

نقمت على يونس أنا و على الحرية المسلوبـة و الأسر و الاختيارات الضائعة و الأهداف اللامحددة

عندما سألتني عن عزيزة

ما كان ردها ؟

هل ذنبها أنها أحبت يونس ؟ أم أنها أخبرته ؟ أم أنها بنت السلطان ؟

عن كسرة القلب هذه عندما يقول لها حبيبها

و هي العزيزة .. بنت السطان ..

لو يتغير الزمان .. كنت أعشق من غير ما تقولي

هذه الـ ( عزيزة )

ربما كرهت السلطان .. الذي يحول أسره لحبيبها .. و لـهـــا .. دون أن يكونا مـعــا.

و ربما نقمت على الزمان الذي ولدت به ، و التقت فيه يونس ، و تمنت لو جمعها زمان آخر ، و مكان مختلف ، يجعل من أسطورة حبها له .. واقعا قريب المنال .

أو جلدت نفسها .. تلك التي لم تكتف بأن تحـــب .. بل و بــــــاحــت بالحب .

لامت نفسها تلك التي كبدتها - و هي الأنثى- مشقة أن تكون من يبوح ..

مضافا إليه عناء جهلها برد هذا الحبيب الأسير ..

ثم صاعقة رده ..

بــ " بتحبي ايه في ؟ "

ربما كرهت عقلها .. هذا الذي طاوع القلب على حب ليس في الأفق مؤشرات لبقاءه حيا ، بل لولادته أصلا .

من يدري !!!!

ربما لما يصب قلبها من رده جرح .. و نقمت مع يونس على الأسر .. على الغربة .. عاشته و توحدت به أيضا. و حاربت معه هذه الحياة الضيق اتساعها .. لازمت ظله ، و أبقت عليه إلى جوار صدرها ، حتى تمنحهما الحياة طوعا أو كرها حقهما في الحياة .. حقهما .. مــعاً و إلا فـ لا.



لو كنت عزيزة .. أو كانتني ..

لكان سخطي و نقمتي على يونس في الأغلب

الذي لو رآني حبيبته حقا لما كسر بِرَده هذا .. و صوت الغناء .. قلبي الذي ترتجف هشاشته أمام اختيار الحب . و لأخذ بيدينا معـا ، و أقسم لي أننا بهذا الوجود سيغتصب كلانا الحرية ، التي لا يفتقدها وحده ، بعد أن صار قلبي أسيرا له . ثم أراود قلبي على كره يونس ، الذي سيبدو لي أمام إقحامات الحياة ، أذاها ، قيودها .. أضعف من أن ينالني .. فكيف بالحفاظ علي؟

فأنى له أن يحمي ضعفي ، و يراعي ترددي الهش .. حتى عندما أدعي القوة .

ثم أنتقل إلى نفسي فأعاتب فيها سوء الاختيار ، و أعاتبها على حب أسميه لها انهزام ،و أقسم عليها أن تنساه ، و أن تخلص منه مضغة الصدر سريعا سريعا ..

ثم اذا جلست إليّ

أعترف .. أني ربما كنت يونس مرات

و أهمس لنفسي ... بدمعة صافية لدنيا تتعمد أذاي فيما أحب

" حبيته .. مذنبيش .. و مذنبوش حاجة .. "

" و هو لو طير ع الأرض واقف بيستعد يطيييييييييير في السما ، و نزلت عليه حجرة من حيث لا يدري ، كسرت له جناح ..

هيكره السما ؟؟

هيجرب يموت ؟

هيعييييييييش

هيجبس جناحه لحد ما يخف

و يرجع يطير

:)

********

عن عزيزة 2009 .. أتحدث

هناك 21 تعليقًا:

تــسنيـم يقول...

يخرب بيت كده..


am speechless


:#

basma saghir يقول...

:)

وانا كمان بصراحة بضم صوتي لصوت الاخت تسنيم

ست الحسن يقول...

يا آية حرااااام عليكي

إيه التحليل الرائع والحساس ده للأغنية
أنا كمان بحبها
وبتلمسني أوي حكاية (كنت أعشق من غير ما تقولي) ..بحسها خاصة جداً

بس تعرفي
انتي أدهشتيني
انتي صغيرة خالص على انك تكتشفي
ان الحب دا بتاع ربنا ومحدش بيختاره ومنملكش نحاسب حد على انه محبناش أو نزعل من نفسنا اننا حبينا

الحكاية دي خدت مني زمن لحد ما فهمتها

....

أول جملة جت في عقلي بعد القراية

يخرب بيت ...
وطبعاً لقيت تسنيم وبسمة سبقوني
فمقلتهاش

...

blue-wave يقول...

اجمل تحليل لأغنيه قريته فى حياتى

نونو يقول...

روعة يا اية
يخرب بيت كده
:)

غير معرف يقول...

وانا اضم صوتى لصوت كل المعلقين الكرام
(هانعمل وش يا بمسة ")؛)

لاكتر من سبب بصراحة...

تــسنيـم يقول...

شفتي أد إييه تعليقي كان بليــغ وإن اختصرت كل الكلمات في... يخرب بيت كده


:)


ألا يا يويا ما تعملي منع للأنونيموس وتريحي دماغك بدل الحاجات الغريبة اللي بيُطلق عليها تعليقات اللي بييجوا يسيبوها ويمشوا

WaNdEr LaNd يقول...

والله المشكله أننا منقدرش نختار اللى نحبه كانت كش مشاكلنا انتهت

بـراااح يقول...

اية
اولا ربنا يحميكي علي احساسك المرهف و علي عمق مشاعرك و اتمني ان يبعد عن هذا القلب الرقيق كل نيران البشر الصديقة و الغير صديقة ...
ثانيا لطالما اعتبرت هذه الاغنية ليست مجرد اغنية جميلة احبها فانا في الحقيقة احب كل كلمة قالها منير باحساسه ... و لكن هذه الاغنية خاصة اعتبرها عبقرية ... اسمعها مرارا و اترك لها احساسي تفعل به ما تشاء
....
اما عن احساسك الرائع و تحليلك اشعر فعلا انه جاء في قوة كلمات الابنودي و احساس منير
....
أسرني أول الأمر يونس .. تعاطفت معه ، أحببته حد التوحد ، رأيتني منه ، و رأيت فيه مني
...
قراتها مرارا و تكرارا فقد حررت احد اسباب حبي لهذه الاغنية بكلماتك
نعم يا اية كلنا نشعر بالغربة و كلنا شعرنا اننا يونس
...
أحببت يونس حد التوحد .. حتى تذكرت عزيزةبنت السطان
...
اصدقك القول انني رغم استماعي المستمر للاغنية الا انني لم اتذكر عزيزة او افكر بها
بل انني قد اكون ظلمتها حين شعرت انها زادت شعور يونس بالغربة
فيونس بشر يملك قلبا عاشقا للحرية و لكنه ايضا في حاجة ماسة للحب
قد يكون وضع حريتة شرطا للسماح لقلبه بالحب
احييك علي تحليلك و استخراجك لمشاعر عزيزة و لكنها حتي الان لم ترد علي سؤال يونس " بتحبي ايه فيه؟؟"
ماذا احبت فيه؟؟ حبه للحرية .. ضعفه و احساسه بالغربة ...
عودة ليونس ...
لماذا سالها هذا السؤال؟
اشعر انه في غربته لا يعيش حقيقتة ... بل يعيش كشخصا اخر داخل غربته كلماته حزينة ... نظراته سجينة ...عينه دامعة
روحه المحبة للحرية اصبحت سجبنة جسد اخر لا يعرفه
...
قلبى ضايع مين يلاقيه لىباينى نسيته حدا اهلى
ينفع احبك من غير قلبى ماتردوا عليها وعليا
...
فيونس يشعر انها احبت شخصا اخر غيرة... شخصا سيختفي بمجرد انتهاء غربته ليعود يونس و يعيش حقيقتة و يفتح قلبه للحب ... فهل ستبقي عزيزة علي حبها ؟؟؟ هل ستحب يونس الحقيقي المحلق في سماء الحرية كما احبت يونس السجين؟؟ ام انها احبت فيه سجنه ليكون ملكا لها وحدها ؟؟
...
اعتذر اذ اطلت عليكي في الكلام و احييك جدا علي تحليلك و تعمقك و اشكرك فقد استمتعت فعلا بكلماتك
ادام الله عليك رقة قلبك و احساسك

كراكيب يقول...

على فكرة بوستك عجبتني مووووووووت
طريقة كتابتك تحفة اوي يا اية
ايه ده انا ازاي معرفش بلوجك من زمان
اكيد هتشوفيني عندك كتير ان شاء الله

آيه يا آيه
اول مرة اخد موضوع يونس وعزيزة بكل جوانبه كدة
مع اني فكرت اكتب بوست عليهم قبل كدة

يونس وعزيزة.. صعبتوا عليا انتوا الاتنين

آية.. اتبسطت اوي من زيارتي لبلوجك
;)

miro el niro kwaniro

MaNoO يقول...

مينفعش أعلق

no comment

آيــة يقول...

تسنيم :
يا سلام :)
لا بجد مدينة لك ببلاغة الكومنت يا بت .. ايه العظمة دي ؟؟

بسمة :
يا سلامييييين :))


ست الحسن :
الجميلة غادة ، ما هو يا حبيبتي احنا للاسف بنتكتشف حاجات كتير ، بس مبنعرفش نصدقها ، نطبقا ، نعملها ..
بفرح اووووووي لما بلاقيكي هنا بجد
ربنا يفرحك يا قمراية :)


د.عمرو :
:)
هو مش تحليل اوي يعني .. أشكرك

آيــة يقول...

:
كده ده هيتعب اوي لما كل دول يدعوا على بيته يتخرب على فكرة



غير المعرف :
فين حضرتك الاسباب طيب ؟؟؟
kiss


no name :
بردو ؟
تؤ
:)


تسنيم :
تفتكري كده هيعمل ايه لما بيته يتخرب بس .. الله يسامحك اول واحدة دعت عليه :))


وندرلاند :
على فكرة مكنتش مشاكلنا هتنتهي و لا حاجة ، كنا هنلاقي مشاكل تانية اكيد :))

آيــة يقول...

:
الرائعة الجميلة المتفردة فعلا :))
ايه الجمال ده ؟
صدقت في كل ما قلت عن يونس ،، تماما .
و لكن يبقى ماذا عن عزيزة ؟؟
الأمر معقد :S
احب مرورك جدا


كراكيب :
انا كمان فرت انك هنا :))
تعالي على طول
زورونا تجدوا ما يسركم D:


manno :
ينفع على فكرة عادي
:)

HAPPY يقول...

كنت عايزه اقولك القصه بتاعت يونس قريتها فى كتاب للابنودى...

يونس كام خاله ابو زيد الهلالى وكانت عزيزخ بنت عدوه ولما حبت يونس سجنته فى السجن عندهم عشان يحبها..
فهو بيقولها وده حب ايه اللى من غير اى حريه؟؟

بس هى دى الحكايه..
اتمنى اكون وضحت وجهة نظر يونس ..

بـراااح يقول...

اشكرك يا هابي علي توضيح القصة
ايه الجميلة المبهورة ... الان بعد ان اوضحت لنا هابي الصورة الحقيقية فانا اعتقد ان مشاعر عزيزة نحو يونس ليس حبا حقيقيا بل حب تملك !!!
كيف نسجن من نحب بدعوي الحب؟!!
عزيزة... بنت السلطان ... التي اعتادت ان تامر فتطاع ... لم تعرض علي يونس حبها ... بل امرته ان يمنحها قلبه ...
يا كل عزيز و عزيزة ... " الحب حرية ... و القلب لو ينقتل ابدا مالوش ديه .."
هذه كلمات و احساس نفس الثنائي الابنودي و منير في اغنية سابقة اعتقد انها ترد علي عزيزة
لك كل تحياتي

آيــة يقول...

هابي :
أشكرك جدا على زيارتك و توضيحك :)
انا كنت قريت القصة قبل كده بس كانت مختلفة عن اللي انتي بتحكيه ، كان اللي أسر يونس هو الزناتي خليفة ، و كان بعد أسره حب عزيزة له ، و كانت حاربت والدها و و قفت قدامه كذا مرة عشان تنقذ يونس و تحرره ، و ع الرواية اللي انا قرياها دي كان كاتب بيرم التونسي مسرحيات شعرية اتمثلت في كذا مكان
:)))
أيا كان ، فالقصد كان على عزيزة 2009 ، التي تحب مأسورا ، في أيامنا دي يمكن اللي أسرته ظروف اقتصادية او اجتماعية أو اهداف ضايعة .....حاجات كتير في وقتنا بتخلي في منا عزيزة و يونس ، و بتخلي الواحدة مننا كمان يونس ...



براح الجميلة :
كلامك رؤية أخرى للأمر طبقا لواية مختلفة .. اذا تدثنا من خلالها ، فأنا اتفق معك تماما .. و مع يونس ربما ، هذا الذي يغتصب حبه .. و الحب لا يغتصب..

تحياتي الشديدة لمروركما :)

الحلم العربي يقول...

يااااااااااااه التدوينة دي اكثر من رائعة
رائعة رائعة
عن عزيزة أم عن يونس نتحدث ...من منهما ضيع الآخر
أم من ضيعهما لأسباب وهمية اخترعها من سبقونا كي تخرب على من يأتى بعدهم صفو الحياة و متعة أن يحظى كل حبيب بحبيبه أو كل يونس بعزيزته
الحقيقة أراني كلاهما مثلك
يونس الذي ضيع أغلى سبب لسعادته من أجل غربة ووحدة لا يدري إلى أين و متى ستنتهي
و عزيزة التى ضيعت نفسها لأنها لم تحتمل وجع الافتقادي و تحملت وجعا أكبر هو البوح لكن دون جدوى
و كفاية كده علشان خلاص هعيط
الله يسامحك بقى
:))

Unknown يقول...

ايووووووووة بجددد تحفة اوووووى يا اية احساسك عالى اوووى خالتينى اسمع الاغنية تانى كأنى بسمعها لأول مرة كانت اكتر حتة بتشدنى فى الاغنية لما يونس كان بيسأل عزيزة "ينفع احبك من غير قلبى " بس دلوقتى الاغنية كلها على بعضها كدااا بقة ليها معزة تانية خالص عندى

Unknown يقول...

التغريبة الهلالية كافية لمعرفة معنى الكلمات

Bahrain يقول...

في اغنية شعرية بس ماني حافظها كان يحكيها جدي.
تقول عزيزة بنت سلطان تونس الايام والدهر كفى الله شرها.

 

أوركــــيد أبيض Copyright © 2009 Flower Garden is Designed by Ipietoon for Tadpole's Notez Flower Image by Dapino