الأربعاء، 1 يوليو 2009

ميــــلاد


الطفلة ذات الضفيرتين المثنيتين التي كانت تقتسم معي (اللوليتا ) في ابتدائي ... أصبحت أما .
فرحت فرحة بلهاء عندما أخبرتني بشكها في الحمل ،  لم أحمل أي مشاعر خاصة لجنينها طوال 9 أشهر ... أنا أخشى الأمر ، أندهش منه ، و لا أعرف حتى كيف يفترض بمشاعري أن تكون تجاهه ...
عندما لحقت بزوجها في بلاد البترول ظللت ألح عليها شهور حملها.. أن تجد حلا يجعلني أعرف بلحظة ولادتها ، و هي تسخر مني ، بأنها لن تفيق لشئ أو لأحد لحظتها ... و لو حدث .. فأهلها أولا .
قبل أربع ساعات رنت علي رنة واحدة ، أزعجني أنها لم تعتد الرن على في هذا الموعد ، و أني أبحث عنها منذ الصباح و لا ألتقيها ..
تركت تحذيراتي و تهديداتي لأختها التي أخببرتني أنها حادثتهم قبل ساعات و كانت مؤشرات الولادة تزورها على استحياء ، و سألتها عن سر الرنة ، و أنا أخبرها في خجل  " انا قلتلها ترنلي و هي داخلة تولد  ... ممكن تكون عملت كده فعلا !! " ، فتفزع معي ... و يخاصمني النوم في لحظات تنتظر هي أن تهب جنينها الحياة ، فيما يأكلني هنا القلق عليهما ، بشكل أقسم أني لم أختبره في حياتي مطلقا .
حبيبتي فتاة ولدت لتكون أما .. و قد حدث .
مبهورة أنا حد الافتتان هذه اللحظة بفكرة الولادة و منح الحياة ، أتوق لرؤية صغيرتها و تقبيلها ، و أتوق لأن أرى عينيها لحظة التقاء وليدتها ، و أتوق لمراقبتها و هي تقبلها القبلة الأولي  ، و أتوق لرؤية زوجها يضمهما معا لأول مرة ...
قبل شهور .. كنت أسأل نفسي بسذاجة : كيف تغادر فتاة أهلها و بيتها و بلدها و صحبتها لتسكن بيتا واحدا مع رجل التقته مؤخرا جدا .. و جمعهما عقد ؟؟
و بعد سفرها ... صرت أسأل نفسي بنفس السذاجة  و لكن بشكل أكثر إلحاحا:
هل يستحق رجل - أي رجل - أن تهجر له حياة اعتادتها بكل ما و من فيها ، لتحيا معه و معه فقط ، بل و تنجب له أطفال تتحمل مسئوليتها التي يعلم الله كم يرهبني مجرد الحديث عنها ...
الآن ، في لحظة أفكر فيها في شعورها و هي إلى جوار زوجها يحتضنان الصغيرة ، يمنحان الحياة لطفلة ، و يتبادلان النظرات التي تحمل كثيرا من العهود التي ربما لن ينطقاها ...تنسى هي آلامها بفرحة فيما يغمره الامتنان و الرضا ....أشعر أن الأمر يستحق ... 
لا أعرف كيف يحدث هذا لي .. و لكني أشعر كما لو كنت أولد من جديد مع الصغيرة ، و أبكي فرحا ، بكاء أقسم أني لم أذقه من قبل أبدا .....
اللهم بارك لهما في الصغيرة ، و اجعلها لهما قرة أعين ، و اجعل من ذريتها من يرضيك عنها ، و يصلح في أرضك ، طيبا طائعا ، غير متكبر و لا عاص .

هناك 10 تعليقات:

تــسنيـم يقول...

نعم الأمـــر يستحق :))


بورك في المولود وشُكر الواهب وبلغوا برهــا

غير معرف يقول...

آآآآآآآآآمين يا رب
الفرحة مش سايعانى ومش عارفةأقعد أفتكر ف تفاصيل
البوست جميييييييييييل أوى بجمالهم هما التلاتة
مش عارفة هوا حلو فعلا وللا ايه؟ بس كل حاجة ف عنيا دلوقتى حلوة بجد
تفاصيل اليوم غريبة أصلها ومهما حاولت مش هقدر أوصفها بس انتى طلعتى جدعة :)

نفسى ف حاجة واحدة دلوقتى
عايزة حد يزغررررررررررط بس نفسى أشوفها أكتر وأشوف زوزى وابوسها
هوا مفيش سلوك لتوصيل المشاعر ليه؟

ربنا يباركلها وتطلع مطيعة وحنونة ومحبة لكل اللى حواليها

ملحوظة نونو:أنا مش اللى بكتب الكلام ده مش عارفة مين اللى بيكتب بس بسجل اللحظة :D

خالتو مهجة
من نفسى بقى :)

Lyssandra يقول...

مبروك لصديقتك
وعقبالك :)

Lyssa

أسما يقول...

انا اول مرو آجي هنا، بس البوست ده فرحني اوي... و أيوة، الموضوع يستاهل، عقبالنا يا رب D:

بسمة ولكن.. يقول...

زوزى ولدت اخيرررااااااااااا

الزغروطة اهى يا مهجة
لولولولولولولولولولولولوى

حمد الله على سلامتك يازوزى
ارجعيلنا بالسلامة بقى عشان نشوف توتى اللى كل الناس كانت بتنعتها زعبوللة
وخالتها بسمة مهانش عليها تنطقها
:)
الدنيا كده بيس وهترجعى لابعادك الحقيقية
رحمة من ربى انى معيشتيش لحظات ولادتك وانا عارفة انك بتولدى
الحمد لله
والا كنتى هتحسى بزلازل القل واصلة عندك هناك
حمد الله على سلامتك وسلامة النونو
وبالنوسبة لعمرو
شد حيلك ياكبير
بقوا اتنين

MaNoO يقول...

فعلا الأمر يستحق كل التضحيات انا محستش الاحساس بس شفته ادامى كتير جدا وشفت الفرحة اللى فعلا ليس لها مثيل لحظة ماتفوق الام على صورة طفل صغير كان موجود جواها وشكر الأب لربنا اولا وليها ثانيا انها اتحملت وصبرت احساسى بيقولى انه فعلا موقف يستحق التضحية ربنا يبارك فى المولود ويرزقهم رزقه ويطيع ربه واهله

Unknown يقول...

ههههه طبعا في رجالة تستاهل كتير ..
شعور الأمومة لا يماثله شعور هكذا تقول أمي دائما
ربنا يهني صاحبتك ويباركلها في مولودها وعقبالك
في حفظ الله

هاني مهران يقول...

جميلة جدا ربنا يوفقك

Dr Ahmed Said@Black Armor يقول...

صدقينى لو قلتلك نفس الامر حصل معايا
لما كانت مراتى حامل ماكنتش زى الافلام باقعد احسس على بطنها وابوسها وكدة كنت مفتقد الرابط مع الجنين
بس يوم الولادة بقدر ما كنت قلقان عليها
لما شفت الولد حسيت بنفس الانبهار بتاعك وحبيته قوى وارتبط بيه فوق الوصف
انها معجزة الحياة ونعمة الخلق

Mohamed Hesham Safa يقول...

بوست جميل

 

أوركــــيد أبيض Copyright © 2009 Flower Garden is Designed by Ipietoon for Tadpole's Notez Flower Image by Dapino