السبت، 30 يناير 2010

Reminder


مرة في فبراير 2005 في واحدة من مكالماتنا الطويلة – كالعادة – كنت سألتك .." تفتكري هنكون فين بعد خمس سنين ؟"

فاكرة قلنا إيه ؟

أنا مش فاكرة أنا توقعت هكون أنا فين .. أو إنتي فين

بس فاكرة جدا إنك قلتيلي " هتكوني متجوزة و عايشة ف الكويت .. "

عشان وقتها ضحكنا جدا

أنا استغربتك و اندهشت من توقعك

كنتي بتتكلمي و انتي يا عشرة الخمستاشر سنة – و لا كام ؟؟ - عارفة ان أسرتنا بقت بتلم بعضها و تتدفى في الغربة هناك و تسيب البرد يبقى قاعد مع اللي قاعدين هنا

و أنا قلتلك إنه .. " لا طبعا .. "

و أنا جزء مني بيقولها عشان أقولك اننا هنفضل هنا .. و مفيش حاجة هتتغير

و اتراهننا .. و قلتلك اني هعملها رسالة تذكير على الموبيل بتاريخ كمان خمس سنين .. و قلنا هنخليه تاريخ عيد ميلادي ، لأنك أكيد هتفتكري تكلميني يومها حتى لو كنا بعيد

و انتي ضحكتي و معلقتيش غير على ان .. " هو الموبيل ده هيفضل معاكي خمس سنين كمان .. ؟ "

و قلتلك " لحد ما اتخطب .. و هو يبقى يجيبلي غيره .. "

و الموبيل ده اللي هو كان الاصيل ابن الناس نوكيا 3310 ، و اللي غيرته مضطرة مرتين لحد الساعة دي ، من غير ما " هو " اللي معرفوش يجيبلي حاجة

و اللي من وقتها بنقل الريميندر للموبايل الجديد و انا ببتسم :

" رهان فبراير 2005 : معه في الكويت "

....

كل مرة أفتح رسايل التذكير الكتير ، و الـ تبدو في معظمها مراهنات مع الزمن .. أبتسم ابتسامة اللي مش فارق معاه بكرة ، و لا مستنيه و لا عارف اللي فيه و لا خايف منه

النهاردة لما شفتها عيطت

عشان اكتشفت اننا ف فبراير 2010 ، و ان السنين الخمسة عدوا

و عشان حسيت ان الدنيا بتقولي " انتي اتكبستي " ، و بتطلعلي لسانها

مكنش ف بال حد منا انك هتكوني هنااااك .. و اني هكون في اللامكان .. اللي انا فيه دلوقتي

و مخطرش في بالي اننا لما نفتح شات ويندو مش هلاقي كلام اقوله .. و لا هبقى عارفة اسألك عن ايه

و اني هطلع عبيطة كده .. و مش هحافظ على عهدي مع نفسي اللي قلت فيه اني مش هقلقك علي ، و مش هزود احساسك بالغربة و اقول اني مفتقداكي

حسيت اني بكلم الدنيا و اقولها " متفقناش على كده .. " و الومها اوي

كنت عايزة امسح الريميندر لاني حسيت بسذاجة و سخافة المراهنة مع الزمن

و امسح رسايل التذكير الباقيين الكتير اللي كلهم مراهنات متختلفش كتير على شهور و سنين جاية

عارفة رغم كل ده حاسة بايه ؟

حاسة اني فرحانة و محظوظة لان سنة زي 2005 بكل ما / من كان فيها كانت في حياتي

و ان كان بيننا مكاملة تليفون طويلة .. زي اللي انا مش فاكرة منها غير السؤال ده

و اني كنت ببراءة الاشتراط ع الزمن اني مغيرش موبايلي غير لما يجيبلي " هو " غيره

و ان كانت عندي طاقة اراهن ع الزمن و اتمنى .

دلوقتي

مبقتش اراهن .. و لا حتى بقيت اخاف

انا بقيت مبآمنش ..

.

.

و لا أبالي .

و لسان حالي :

" إياكش تولع "

.

موحشتينيش.

هناك 15 تعليقًا:

تــسنيـم يقول...

:|

أنا مصدومة على فكرة جداااااا

مصدومة بجد .. مصدومة أوي

مش عشان ال5 سنين عدوا خلاص _ مع إن لسه فيه 7 شهور على شهر عيد ميلادنا العظيم و محدش يعرف بكرة فيه إيه _ بس عشان دي مش إنتي خالص


عرفتي ليه بقى ما رديتش أعمل تو دو ليست قبل ما أكمل 30

:))

zozy يقول...

agaz lsany
yaaaaaaaaaaah ya aya
w7steeny awy ww7shoony el5 snen dol welly 2ablohom welly 2ablohom
yah e7na fe3ln 3mlna keda
wyaaaaaaaaah kman 3lshan mesh 3arfa 3lshan eh
ana 7assa enny s3'ert tany
..
.
.
.
mesh 3arfa
wmesh 3arfa agma3ny
wla enty w7ashteeny 3la fekra
wla klamna weltlefon wshre3 elnady welgebna welzatoon w7shoony
yaaah b2a

غير معرف يقول...

كدابة :(((((
انا بحسدك على ان ليكى ذكريات محددة بتتفاعلى مع الزمن وبتتحديه
عايزة أقوللك ان البوست ده حلو أوى بس انتى اللى وحشة أوى عشان خلتينى أعيط يمكن عشان بحاول الاقى ذكريات ومش عارفة .. مش عارفة أجيب الذكريات من دماغى وانتى باللى بتعمليه ده بتدخلى ذكريات جديدة زى ما بحاول أتقمص شخصيتها عشان اعمل ذكريات مفتعلة ليها معايا
وبعدين بقى انتى مخسرتيش اوى الكويت حاجة والسعودية حاجة تانية :)

شوية قهوة يقول...

انا كان عندي تعليق بسيط اشمعنى الكويت؟؟؟؟؟

آيــة يقول...

تسنيمة
هي أنا على فكرة .. و متتصدميش ، انا وقتها متخيلتش اني هعيش الـ 5 سنين اصلا :)
بس خدتي بالك اني كسبت الرهان ؟؟
و اني كتبت الموضوع كله .. عشان اكستشف سذاجة اننا نراهن على زمن ، ف الآخر مش بس بيمشي مش شبه توقعاتنا ..
لا
ده ساب كل توقعاتنا ف حالها و لا قربلهاش
و عمل اللي على كيفه ..

الرهان ... سخافة .. و غباء.
:)

آيــة يقول...

زوزي
:)))
موحشتينيش برضو .



غير معرف :
انتي ليكي ذكريات كتير .. و انتي مش ناسياها كمان
هي بس الذكريات مش بتيجي كده بالاستدعاء .. هي بتقحم نفسها ف الوقت اللي على مزاجها فتلاقيها على بالك .. و متلاقيش حاجة غيرها بتلح عليكي
على فكرة انا حلوة .. مش وحشة
:P :P



سماء
الكويت .. عشان انتو فيها يا ناصحة
:))

هدى يقول...

بصرة

"حاسة اني فرحانة و محظوظة لان سنة زي 2005 بكل ما / من كان فيها كانت في حياتي"

هو أنا من ايام قليلة حاولت اكتب عن 2005 حاسة انها سنة فارقة ف حياتي ,, مش هقول اني فرحانة ومحظوظة ,, هقول اني ممتنة للسنة دي,,,,

..

صباحك ذكريات

الحلم العربي يقول...

جميلة جدا
عجبتني قوي بالعامية كده أقرب
أقولك على حاجة ...يمكن زمان كنت براهن نفسي رهانات زي دي...بس عارفة كمان كل ما ألاقى نفسي خسرت رهان ألاقيني كسبت رهان أكبر
يعني من خمس سنين كنت بتمنى حاجات تحصلي لو بتخيريني دلوقتى أقولك يا ريت ما تحصلش فبحمد ربنا انها ما حصلتش
و كل ما يمر العمر بكتشف ان اللى مكتوبلي أحلى بكتير من اللى اتمنيته لأنه يحمل كل معاني التجربة و التشويق
يحمل مشاعري الحقيقية لما بكون قلقانة من حاجة
حتى اخفاقاتي بكون مبسوطة اني قابلتها علشان لما اقابل حاجة كويسة اعرف ان ربنا بيكافئني على انى استحملت اخفاقات قبل كده
انا رغيت كتير
اقعدي بالعافية بقى :)))
بحبك قوي

غير معرف يقول...

kol marra a2ra elpost a2ol fe
ellawa3y el2aty...
أنا مش فاكرة أنا توقعت هكون أنا فين
twqa3ty drasatek wresalatek wgam3atek wcareerek wel3'reeb enk hatbd2y t5sa3y fe a5er el 5 sneen
كنتي بتتكلمي و انتي يا عشرة الخمستاشر سنة – و لا كام ؟؟
e da enty lessa bt3eddy?!!!!ana tah menny el3add men zmaan mesh 3arfa 3lshan homma kteer wlla 3lshan btalt drasa elly hya mastret elsnen lelly zaye..belmonasba ana lessf rkra enny dof3et elsana elly fatt wenny makmeltsh sana monz elt5arog
لأنك أكيد هتفتكري تكلميني يومها حتى لو كنا بعيد
ana olt keda??dana tyeba awy:P
(de 3'tata mesh tb3 enf3lat kol mrra)
كل مرة أفتح رسايل التذكير الكتير ، و الـ تبدو في معظمها مراهنات مع الزمن .. ......
men awel hena dmoo3 w7neen wtnheeda ma3rafsh m3naha
wfe el2a5er
موحشتينيش
wla enty

Aml Ghonaim يقول...

عارفة المشكلة فين ؟ في الكويت !
بتخنق منها !!!!
ذكرتني تدوينتك بذكريات قريبة منها ..
كنت دائمة الرهان معها على المستقبل !
مع الأيام اكتشفت الأسوأ !
قالت لي يوما : مش هانسى أكلمك ولو في السنة مرة !
تعجبت ... وأيضا غضبت !
في السنة مرة !!!!
والآن : هذا تماما مايحدث !!!
اشتقت لها ولك :)
وتقريبا ( لي ) أيامها ...
دمتي بود ........

Unknown يقول...

تعرفى

دلوقتى وفى الوقت الراهن من حياتى..مسيطر عليا فكرة واحدة

ازاى ارجع بالزمن عشان اسحب كل مراهناتى اللى راهنتها وخسرتها؟؟ ازاى امسح من ذاكرة اللى حواليا كل الحاجات والكلام اللى كنت بقول انى هعمله وانه لازم هيحصل؟؟

مش عشان شكلى قدامهم..بس عشان انا شايفة فشلى فيهم..من غير ما يتكلموا انا شايفة فشلى..

انا مقهورة اوىىىىىىىى

Unknown يقول...

هو انا ممكن اضيفك عالمسنجر؟؟؟؟

بسمة ولكن.. يقول...

انا أول مره أعلق ف اوركيد أبيض
زينب أنا فاكرة الجبنة والزيتون واليوم اللى انتى حكيتى لى فيه انك خرجتى مع أيه ف شارع النادى وكنتى أد ايه مبسوطة
وانا كنت مستغربه ايه اللى يبسط ف الخروجة الغريبه دى
بس عادى
اللى مستغرباه انى افتكرت الحدث مع انه ميمسنيش باى صلة ولا كنت أعرف أية دى
بس عادى
كنتى انتى اللى ساعتها موجوده على طول وأيه دى كش بنشوفها غير ف المناسبات
بقيتى انتى دلوقتى اللى مش بنشوفك
وبقى ...عادى
بس اللى مش عادى انى كل م اتكلم عنك اومعاكى على النت بتخنق ودموعى تقرب
وتبقى لحظة غريبه ف يوم ف الغالب بيكمل ف الاخر عادى
متعانديش الزمن يا ايه وتعملى راسك براسه
بس خدى منه اللى يخصك

أسما عواد يقول...

بوست رائع جدا
جدا
عجبني الموضوع
هيا لعبة الزمن والتغيرات غصب عننا خاضعين ليها

إبـراهيم ... يقول...

((عارفة ان أسرتنا بقت بتلم بعضها و تتدفى في الغربة هناك و تسيب البرد يبقى قاعد مع اللي قاعدين هنا))
....... مبرووووك إنك كسبتي الرهان، ومبروك شعورك بالزمن!


إياكش تولع ..فعلاًا!

بوست حسَّاس جدًا يا آآيـــة ـ كالعادة ـ تسلمي!

 

أوركــــيد أبيض Copyright © 2009 Flower Garden is Designed by Ipietoon for Tadpole's Notez Flower Image by Dapino